اشرف غنی در پیوند به حملۀ تروریستی در ولایت خوست اعلامیۀ مطبوعاتی صادرکرد.

تروریستان در روز نخست ماه مبارک رمضان با انجام حملۀ تروریستی در ولایت خوست، شماری از هم‌وطنان ما را شهید و مجروح نمودند.

گروه‌های تروریستی که به ارزش‌های دینی و روزهای متبرک ارج قایل نیستند، بار دیگر به اشارۀ باداران خود مرتکب جنایت‌بشری و عمل نابخشودنی گردیدند و بی‌رحمی شان را ثابت ساختند که این عمل جانی آنها در هیچ دین و آیینی، توجیه‌پذیر نیست.

جنایت‌کاران باید بدانند که کشتن مردم و هدف قراردادن شهروندان بی‌گناه، هیچ‌گاه آنان را به اهداف شوم شان نمی‌رساند، بلکه نفرت و انزجار مردم نسبت به آنان هر روز افزون‌تر می‌گردد.

رئیس‌جمهوری اسلامی افغانستان، ضمن ابراز تأسف عمیق به‌خاطر این حادثۀ المناک، به خانواده‌های قربانیان حادثۀ مذکور تسلیت عرض نموده، به مجروحین صحت‌مندی کامل و به شهدا از بارگاه ایزد متعال جنت فردوس التجامند است.